新年快樂! 上年<賭城群英會> 嘅一場戲令BENNY同張家輝、舒淇、王晶、陳法蓉合演嘅呢套 <賭聖3無名小子> 翻生熱爆兼上埋報 (有心者請自行GOOGLE)，講起呢套應該係BENNY '99五寶入面最出位同最重戲份嘅一套，但代價就係形象全毀徹底黑化 (形象大過天嘅黎生究竟匿喺廁所喊咗幾多晚哈哈)。
故事講述麻甩三兄弟張家輝、彭立威同BENNY近排密密上深圳搵老襯。
原來佢地聯同四舅父王晶夾計扯貓尾做老千搵食，呢期喺上面執咗唔少。
撈得咁揚就梗係得罪大佬龍方，唔止比人打一身仲爭啲要留低埋隻手。
最終張憑千術賭贏龍，佢地先有命仔返嚟食糖水再落STAREAST溝女。
差人叔叔呀呢度有個傻佬著住件姣婆紫周街飛釘兼CHOK樣呀唔該快啲拉佢走哈哈。
搞完笑入返正題，張對盲女超模舒淇一見鍾情，BENNY拍晒心口話幫手溝佢返嚟 (左上圖啲佈置證明係上年萬聖節前後拍架啦)，仲比佢諗到返教會扮弟兄博好感 (右下圖個呆樣好得意呀)。
為報答BENNY，張除咗收佢做徒弟教佢賭術，仲帶埋佢上去報牌一齊跟龍搵食 (嘩左上圖制服LOOK都出埋，係咪想做返老本行空少哈哈)，點知BENNY原來早就唔聲唔聲背住佢地向龍靠攏......
反骨BENNY為上位不惜處心積慮搞到張永不翻身，先害到舒爸許紹雄輸大錢而跳樓死，仲攞個鐵垃圾桶一嘢鏗爆張個頭整到佢盲，再搶埋王間酒吧，最後更當住張面前老強咗舒 (我梗係唔會CAP低黎生啲黑歷史啦，想睇就自己上YOUTUBE啦哈哈)，張從此一蹶不振直插谷底。
張痛定思痛決定重出江湖有仇報仇攞返屬於自己嘅嘢，仲搵埋洪興做公證同BENNY賭天光輸死無怨 (好好笑，BENNY上一套 <古惑仔激情篇洪興大飛哥> 又係同洪興過唔去哈哈)。
賭到最後一局，王慘遭遇害，又有二五彭從旁加害，但BENNY自己唔爭氣牌面處下風，又得知張原來只係扮盲早已復明，淆得濟走咗去挾持龍，結果洪興幫乘亂一槍射死BENNY，最諷刺係睇返底牌先知應該係BENNY贏哈哈。
睇到BENNY出席首映嘅呢個新短黑髮LOOK就知踏入千禧年佢又步入演藝生涯嘅另一個新階段，就係拍電視劇啦! 不過因為係長劇，請比多少少時間我去整理，有緣再見!
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
上回講到BENNY重拾歌星身份到新加坡宣傳新碟 <一個夢>，可惜據報道指當時只匆匆逗留三四日就要飛返香港，原來係為咗趕拍呢套同黃秋生、麥家琪、林子善、梁焯滿合演嘅 <古惑仔激情篇洪興大飛哥> 煞科戲，一睇個演員陣容同幕後班底就知係同 <山狗1999> 接住拍架啦!
今次BENNY飾演東興嘅頭馬皇帝哥，而林子善繼上次 <山狗1999> 做佢親細佬後今鋪都繼續認佢做大佬，同梁焯滿幾個古惑仔WE WE WET WET賣吓丸仔，睇吓BENNY今晚又收多兩件傻仔返嚟點佢地返學校散貨。
鏡頭由D場轉落冰室，話說BENNY溝掂劉鈞儀，但劉爸係對家洪興嘅人，兩幫世仇約出嚟講數，大飛哥黃秋生同阿嫂麥家琪都知BENNY係食女王，但佢今次做晒戲扮晒好仔話會改，劉又貪人副偈迷咗入去，黃、麥都無咁好氣由得佢踩落個氹度。
交完戲嘅黎生轉個頭返到屋企已經狂打電話FLIRT女，仲比劉斷正CUT線都CUT唔切 (右上圖扁咀好得意呀!)，最後當然要 (例牌借位) 咀咀補數。
潮州幫有大茶飯益東興，BENNY安排林等扮遊客走粉出貨去金爺度，以為想拱佢地做爛頭卒送死咩，點知佢居然話萬一出咗事貨可以唔要，最緊要人無事，最終佢地幾件蛋散梗係比警察摷到，九秒九掉走啲貨即撇，而BENNY又真係半句都無鬧，究竟搞邊科咁兒戲咁荒謬......
另一邊箱，林媽死前自爆黃係林嘅親生老豆，仲交帶落要好好睇住佢，黃為咗寶貝仔嘅前途不惜扮死狗求東興放人，但係當然傾唔埋欄啦，開始黑化嘅BENNY一臉奸笑暗寸自己阿大，話得罪黃小心以後無好日子過。
潮州幫好快收到風啲貨無晒，懷疑比東興食夾棍但又苦無證據，點知BENNY背住阿大偷偷打電話比金爺，老屈今次單嘢係阿大同黃呢兩幫大佬做嘅，睇BENNY奸到出汁個樣 (左下圖好型!)，就知佢成功博得金爺信任，仲借埋金爺把刀隊冧阿大。
阿大瓜柴，BENNY順理成章比班叔父捧上位做東興老頂，更加大模斯樣落D玩女，仲車咗嚟捉姦嘅劉一大巴，話唔止佢地玩完連撐佢嘅黃都就快玩完。
要對付黃邊有咁容易砌吓生豬肉落吓追殺令就搞掂呀，BENNY出動黃嘅死穴林做人質先引到佢出嚟，為咗個寶貝仔黃甘願比佢拳打腳踢再跪三個響頭。
以為稱霸在望可惜百密一疏，劉及時趕到大義滅親播返段電話錄音出嚟，原來上次捉林嗰班警察係BENNY搵人假扮嘅，自己截咗批貨再設局嫁禍兼謀反，BENNY結果被家法侍候，祠堂一嘢比人隊到變冬瓜盅哈哈。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
99年BENNY除咗忙於拍攝電影作品，音樂方面仲做埋國語人，唔止繼續做OST歌王貫錄人氣電視劇 <少年英雄方世玉> 插曲 今夜我想醉，最重要嘅係趕得切喺世紀末前推出久等兩年嘅處男國語大碟 <一個夢> (咁夾嘅，BENNY上一張唱片
<駿新人> 碟名又係三個字，連封面相都一樣著住件高領大褸哈哈)。
一個夢
CD
10. 好運會繼續來
VCD
唔好以為今次隻碟主攻國內市場 (記得BENNY上年北上做男一嘅 <偏偏愛上你> 嗎?)，如果有留意上期剪報，今次出碟係幫佢開拓星馬市場 (睇到起碼有四首做咗新視劇集歌就知)，其實早喺年頭BENNY已有機會客串當地處境劇 <我家樓下口多多> 兼唱主題曲 好運會繼續來 鋪吓路入吓屋，籌備至9月尾終於可以再飛多次去新加坡正式發片做宣傳。
全碟風格以抒情慢歌為主，同一般港式國語碟嘅製作模式相近，碟內接近一半歌曲都係改編返廣東作品，好似打頭陣嘅主打 現代的愛情都背叛了永遠 原曲為監製羅堅96年嘅作品 COME BACK TO ME，副歌一句 '我們才發覺愛情不是一切～ 是現代太容易抽離的感情 我們都背叛了永遠～' 聽得出黎生又扮偶像學友啲尾音哈哈。
上圖所見 現代的愛情都背叛了永遠 嘅MV喺香港拍攝 (應該係西灣河碼頭)，BENNY繼續出動佢99年至愛嘅夏威夷裇出鏡 (睇真啲今次隻碟嘅封套內頁都似係同一地點取景喎!)。
仲有之前介紹過改編自師兄羅嘉良 <天地豪情> 主題曲 仍然在痛 嘅 愛情不是遊戲 ，當然唔少得BENNY自己 <駿新人> 入面嘅歌啦，包括 害怕．逃避．以後 (最怕聽見自己在哭泣) 同埋 愛一生都不夠 (情陷篇) (愛你一生不變)。
至於另一首好歌主打 對不起! 我自私 編曲以木結他作伴奏，隱約帶有一種孤清 / 恍惚 / 落泊嘅意境，公司都好識貨，攞埋嚟做BENNY之後主演嘅電視劇 <影城大亨> 嘅插曲 (詳情留意日後篇章)。
圖中所見BENNY似係日頭拍完 現代的愛情都背叛了永遠 夜晚就換件裇衫自己一個上山頂踩埋 對不起! 我自私 個MV。
上回提到 有了你 同 我有一個夢 先後錄製咗兩個合唱版本，第一個係同內地女星董曉燕合唱嘅 <偏偏愛上你> 版，原為該劇嘅主題曲同插曲，而第二個就係同新加坡女星鄭秀珍重新貫錄嘅 <一個夢> 版 (話晒今次喺獅城出碟，當然要同當地藝人交流合作啦!)，鄭更加喺6月底專程飛過嚟香港錄音兼拍 有了你 MV。
MV取景當然要貫徹上面兩個MV嘅 '香港一日遊' 比新加坡嘅朋友感受一吓香港特色啦，片段所見蘇豪 / 維港 / 會展 / 青馬等景點全部去勻，最後梗係要入錄音室拍埋錄音花絮啦!
講到成隻碟入面小弟最愛嘅歌係 我在等你說愛我 同 OH OH 又是一天，如果大家鍾意聽90年代初比較經典大路嘅國語曲風，呢兩首一定唔會令你失望! 兩首都非常舒服順耳好聽!
不過最估唔到嘅係隻碟出版咗年半，喺啱啱播完BENNY另一套電視劇 <美麗傳說> (詳情留意日後篇章) 之後，居然有得喺台灣重新發行，仲改名做 <求婚>，而兩首主打亦成為同名外購劇嘅宣傳歌曲。
求婚
CD
CD EXTRA
上圖所見封套內頁唔知點解無啦啦用返 <駿新人> 時期嘅舊相，我自己就鍾意 <一個夢> 啲相多啲 (有跨越千禧嘅感覺)，唔止包裝設計就連曲目次序都重新執過，我覺得排得好過 <一個夢>，雖然少咗一首 好運會繼續來 (版權問題?)，但就多返兩隻MV，抵讚!
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
上回提到BENNY 99年刻意曬黑、染金髮同著夏威夷裇大曬陽光形象，而今次呢套同黃秋生、梁敏儀、林子善、梁焯滿合演嘅 <山狗1999> 入面，呢個SUMMER LOOK就更為明顯。
故事講述田徑好手BENNY帶女友梁敏儀同細佬林子善等一行六人勇闖荒島，三對情侶三日兩夜開心大露營。
睇吓黎生幾咁鍚住自己個形象，夠膽死扮純情初戀男友都唔止，仲要荒山野嶺都淨係肯借位咀吓哈哈。
途中BENNY佢地識咗黃秋生同梁焯滿幾個古惑仔，本來各有各玩，點知梁唔識死蝦住喺島入面嘅弱智蜥蝪仔，結果得罪愛子如命嘅麻瘋癲佬老豆，怪事逐漸發生，兩班人開始一個又一個離奇失蹤，直到大家喺草叢發現黃條屍先知大獲......
越夜越心寒，成班都有得震無得訓，只想盡快搭聽朝早船離開呢個鬼地方 (嘩右上圖黎生TANNED到呢)，正當梁諗住靜靜雞竄返入營打電話報警嗰陣，麻瘋佬已經喺後面捕實滅口，睇左下圖BENNY個樣驚成咁，就知死神來了......
好衰唔衰，佢地四個到咗呢刻先嚟玩內訌，女子組一走散唔使半秒就出事，BENNY同林沿路跟蹤蜥蝪仔，終於搵到佢地個山狗竇 (右下圖真心型到無得再型，巔峰狀態!)。
林為救女友同阿嫂不惜挾持蜥蝪仔做人質，可惜誤中陷阱同佢一齊比竹枝網插死，一命換三命只為BENNY能夠帶兩女逃出生天......
BENNY決心要為細佬報仇，通宵喺樹林搭好鐵枝機關，等到第二朝一早成功殺死麻瘋佬。
開心咗唔夠兩秒，麻瘋婆接力化身山狗電鋸殺人狂，搏命追鋸BENNY要佢填命，BENNY著住對釘鞋跑呀跑，跑到懸崖邊生死一線之際，麻瘋婆剎唔切掣一嘢撻咗落海。
埋單十個死淨兩個，以為終於大步檻過可以坐船離開煉獄啦，點知最後一鏡影住麻瘋婆用盡最後一分力都要捉實船尾拖住一齊走......
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
今次同錢小豪、陳法蓉、張文慈、雷宇揚合演嘅 <潛龍奪寶> 雖然係99年五套電影入面最遲上畫 (但如果計開鏡時間則屬較早，所以想順序寫咗呢套先)，但正正係我最鍾意嘅一部，一嚟開心見到BENNY花心思設計新形象 (髮型/膚色/服裝) 作新開始，二嚟今次 '靚仔貴/高佬貴' 嘅角色設定比較少有地可愛討好，令人睇得舒服，從下面剪報所見BENNY自己亦非常珍惜今次能演忠角!
故事講述越南串燒三兄弟龍尊、錢小豪、BENNY (好好笑，記得 <飛虎雄心2之傲氣比天高> 入面佢又係做越南難民嗎?) 離開難民營後得老闆張午郎收留，喺佢開嘅潛水工程公司度打工。
幾條麻甩佬嘻嘻哈哈又HEA一日，睇吓BENNY幾緊張佢個歌星形象，返到公司第一時間就影佢塞住個HEADPHONE聽歌。
打完牙骹焚完機嘅黎生再大派福利：洗白白唱歌仔，當正自己開紅館演唱會咁款噃!
放工成班再落酒吧HAPPY HOUR，招積黎生即場表演拿手絕技：彈火柴賭啤酒。
一輪輕鬆搞笑之後開始入戲肉，BENNY收到風有人會由水路走私外匯，成千萬美金咁和味梗係要約埋錢諗計佈局撈返一筆啦。
兩個靜靜雞潛落公海，幾吓散手就撬走批錢返嚟，睇BENNY伸晒脷咁以為得米啦，點知打開一睇得嗰一百蚊美金，白做二人組即時頹爆。
兩個懵盛盛唔識貨，走去賤賣比收買佬程守一，都唔知原來盒嘢並唔係裝咩外匯現金，而係以雷為首嘅國際犯罪集團用嚟干擾導彈系統嘅高科技儀器...... (認住呢款夏威夷裇，之後幾篇再同大家逐件數逐件捉)
程急急轉手以為賺大錢，點知就係無咗嗰張一百蚊美金鎖匙搞到開唔到，程為求甩身於是呃佢地去機場分錢，實質交人比組織，BENNY呢個HEADPHONE男就咁樣做咗替死鬼......
BENNY被帶到去公海後即比雷五花大綁兼大肆盤問，但擺明咩都問唔到，結果錢同張只能眼白白睇住BENNY活生生被五馬分屍...... (不過我覺得最慘唔係要死，而係辛辛苦苦GEL好嘅頭就咁比無情嘅海水浸到無晒哈哈)
以下係收集返嚟嘅文字剪報 (灑吓鹽花賣吓肉，即刻多幾多報道哈哈)，希望大家會知道多啲BENNY今次嘅拍攝趣事同花絮啦：
- - - - - - - - - - - - - - - - - - - -
棄歌從影要一鳴驚人 黎駿赤裸上陣博出位
(星島日報 | A30 | 1999-05-31)
歌手黎駿棄歌從影，昨日為電影《潛龍奪寶》拍場出浴戲。他說：「我去到現場，才知有這場戲，由於劇情需要，我與經理人商量過之後，覺得無問題便決定去馬。」
黎駿演出這個鏡頭，導演共拍了三個版本，分別是背部全裸、半裸與穿上泳褲，至於最終會用那個鏡頭，則要其經理人與導演看了毛片後才決定。
獨怕臀部線條欠佳
為了忠於藝術及演員道德，亦希望自己可以出人頭地，他不介意背部全裸上陣，只擔心自己的臀部不夠靚，效果不好。拍這場戲時，有沒有做足防走光的安全措施? 他說：「導演話我已經大個仔，唔駛怕醜，所以我沒有在重要部位黐上膠紙，因為獻出了我的第一次，我要求清場拍攝，不許女性在場，免得尷尬。」
《潛》片會有場潛水戲，多個演員也要下水。黎駿說：「有相士叫我不要游水，否則會行衰運，但我仍愛水上活動。」
- - - - - - - - - - - - - - - - - - - -
黎駿清場演全裸戲 顧及形象拍三版本
(香港商報 | C07 | 1999-05-31)
黎駿昨日為《潛龍奪寶》一片，拍了一場有三個版本的沖涼戲，原本導演要求他全裸演出，但他怕會影響形象，妨礙即將在新加坡出唱片的計劃。
在經過商量後，他決定拍三個版本，分別是背部全裸，半遮半掩及穿上內褲，到最後影片上映時，才決定用哪一個版本。
黎駿表示，過往拍MTV他也曾試過穿內褲，但全裸還是首次，因此他要求導演清場，特別是不准女性工作人員在場，免得尷尬。
在片中，黎駿飾演一個忠的角色，但最後也是死得很慘，他笑言自己拍戲以來曾死過多次，但今次能夠改邪歸正做好人，總算死得值得。
而稍後他會為這部戲學滑水，原來黎駿一直都學滑水，但有相士曾忠告他不要常游水，因為游水會令他的運氣走失，雖然他自覺運氣真的不好，但卻未想過因此而放棄游水。
- - - - - - - - - - - - - - - - - - - -
黎駿全裸演新戲
(明報 | C03 | 1999-05-31)
黎駿在片中要犧牲色相，拍場背部全裸出浴戲，昨日他就是拍這場戲，足足拍了一小時。黎駿笑謂：「好彩不是浸浴缸，要不然，浸上一小時，皮都皺。」
由於當時是清場拍攝，沒有女人在場，所以他沒有在重要部位上黐上膠紙防走光。他也信得過導演，不會將他的走光照外泄，乃因導演知他稍後會在新加坡出唱片，怕這個背部全裸鏡頭，對他的形象有損，所以多拍兩個不用露臀的版本，上畫時才決定用那個版本。
- - - - - - - - - - - - - - - - - - - -
黎駿游水減運氣?
(文匯報 | 1999-05-31)
黎駿為了拍電影《潛龍奪寶》不惜犧牲色相，昨日他穿泳褲拍一場淋浴戲，一拍就一小時，他笑言好彩不是浸浴，不然皮都皺，這場戲共拍了三個版本，其中一個背部全裸，拍時他要求清場，始終這是他第一次在人前全裸。
他自言不介意全裸，最緊要拍出來有美感，昨日來到拍戲現場才知要全裸，因為他要在新加坡出唱片，為免影響形象，拍多兩個穿泳褲的版本，等經理人看過後與導演決定用哪個版本，他表示不擔心影響形象，最怕拍出來沒美感，對自己的臀部他不大有信心。
戲中他也要潛水，這些自會有人教，他自言不怕水，可是相士叫他最好不要游水，下水運氣會被扯掉，他亦覺得游完水運氣不大好。
- - - - - - - - - - - - - - - - - - - -
錢小豪逃出虎鯊口 黎駿露臀三個版本
(新報 | C05 | 1999-05-31)
黎駿在《潛龍奪寶》中有一場沖涼戲，只見他身穿一條泳褲露兩點十分性感，他坦言為迎合不同市場需要，單是這場戲已拍了三個版本。
著泳褲只是其中一個版本，另外兩個版本較 '激'，一個背部全裸，另一個則是露出大半個臀部，由於他都是去到拍攝現場才知要拍這場戲，之前已趕不及操弗，幸好身形尚算見得人!
- - - - - - - - - - - - - - - - - - - -
錢小豪潛水遇虎頭鯊
(大公報 | D08 | 1999-05-31)
錢小豪與黎駿等人昨日開工拍攝《潛龍奪寶》，前者已有兩年潛水經驗，故黎駿需得向他好好請教。
黎駿是潛水的新丁，他昨日拍攝一場沐浴戲，但到了現場才知背面要裸露上鏡。他說：「我立即致電經理人徵詢意見，因稍後我有唱片於新加坡推出，怕會影響形象。不過我覺得問題不大而導演亦明白事理，提出拍攝三個版本方案，最後會採用那一個，則留待經理人看過才決定。」而他自己覺得該片角色很好，又不用再做奸角，故更希望做得更好。
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
