好多97年嘅新人都喺前一年開始滲入各大平台曝光，而BENNY就更好彩，第一步先獲文雋賞識踩入影壇，拍攝由陳曉東、張智霖、莫文蔚、吳辰君主演嘅處男作 <飛虎雄心2之傲氣比天高>，原先監製屬意BENNY同其他新人一樣做飛虎仔行行企企，但唱片公司唔想佢剪短髮破壞歌星形象，點知誤打誤撞錯有錯着，反而比佢執到一個比其他新人更出位嘅角色。
故事交代東東喺學堂畢業後，同拍檔李忠希一齊入咗交通部，一次當值抄牌期間不幸撞正兩名長毛殺手──老大邱禮濤同馬仔BENNY，原來佢地今次嘅目標就係入面個車主，混亂間李亦無辜送命，BENNY仲一度逼近東東想嘭埋佢乾手淨腳，不過咁啱無晒子彈先可以大步檻過，但已經比佢嚇到個心離一離。
原來BENNY佢地係越南船民，平時喺難民營入面爛爛笪笪凶神惡煞，唔着鞋周圍走仲成日飲酒，連大緊肚嘅老婆陳妙瑛都無晒佢乎，由得佢繼續自閉扮COOL做 '啞仔'。
有一次幾個細路同駐守警員發生衝突而被掌摑，BENNY睇唔過眼帶頭還擊打人，一眾難民乘機搞大件事發動暴亂，仲挾持吳做人質，話如果政府唔保送佢地去美國就炸咗個倉大家一鑊熟。
不過原來邱另謀獵晒啲軍火走佬，由得班留守嘅難民等被炸死，BENNY終於忍唔住 '大開金口' 鬧佢地幾個出賣同胞，向佢地亂槍掃射一番之後獨自返倉房搏鬥，轉咗做飛虎隊嘅東東一見到BENNY就諗返當日嘅惡夢，三魂唔見七魄之際就比佢挾持住，不過喺隔離嘅陳亦告斷氣，BENNY一分心望老婆就死喺COOL魔嘅槍下。
除咗獻出電影嘅第一次，BENNY亦喺追月日以歌星身份上 <週末任你點>，同林敏驄、鍾漢良、陳琪、ER齊齊玩遊戲慶中秋。
圖中所見，佢地分別玩咗睇片答問題同埋畫畫估歌名，我相信BENNY當日係有現場演繹新歌 (仲可能係佢第一首主打歌!)，可惜影片唔完整所以睇唔到，希望有高人出手指點。
photo credit: 彌敦道人與車@weibo (7, 8 of 9)
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
No comments:
Post a Comment