[1999] 山狗1999 (黎駿 飾 Ken)

上回提到BENNY 99年刻意曬黑、染金髮同著夏威夷裇大曬陽光形象，而今次呢套同黃秋生、梁敏儀、林子善、梁焯滿合演嘅 <山狗1999> 入面，呢個SUMMER LOOK就更為明顯。

故事講述田徑好手BENNY帶女友梁敏儀同細佬林子善等一行六人勇闖荒島，三對情侶三日兩夜開心大露營。

睇吓黎生幾咁鍚住自己個形象，夠膽死扮純情初戀男友都唔止，仲要荒山野嶺都淨係肯借位咀吓哈哈。

途中BENNY佢地識咗黃秋生同梁焯滿幾個古惑仔，本來各有各玩，點知梁唔識死蝦住喺島入面嘅弱智蜥蝪仔，結果得罪愛子如命嘅麻瘋癲佬老豆，怪事逐漸發生，兩班人開始一個又一個離奇失蹤，直到大家喺草叢發現黃條屍先知大獲......

越夜越心寒，成班都有得震無得訓，只想盡快搭聽朝早船離開呢個鬼地方 (嘩右上圖黎生TANNED到呢)，正當梁諗住靜靜雞竄返入營打電話報警嗰陣，麻瘋佬已經喺後面捕實滅口，睇左下圖BENNY個樣驚成咁，就知死神來了......

好衰唔衰，佢地四個到咗呢刻先嚟玩內訌，女子組一走散唔使半秒就出事，BENNY同林沿路跟蹤蜥蝪仔，終於搵到佢地個山狗竇 (右下圖真心型到無得再型，巔峰狀態!)。

林為救女友同阿嫂不惜挾持蜥蝪仔做人質，可惜誤中陷阱同佢一齊比竹枝網插死，一命換三命只為BENNY能夠帶兩女逃出生天......

BENNY決心要為細佬報仇，通宵喺樹林搭好鐵枝機關，等到第二朝一早成功殺死麻瘋佬。

開心咗唔夠兩秒，麻瘋婆接力化身山狗電鋸殺人狂，搏命追鋸BENNY要佢填命，BENNY著住對釘鞋跑呀跑，跑到懸崖邊生死一線之際，麻瘋婆剎唔切掣一嘢撻咗落海。

埋單十個死淨兩個，以為終於大步檻過可以坐船離開煉獄啦，點知最後一鏡影住麻瘋婆用盡最後一分力都要捉實船尾拖住一齊走......

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1999] 潛龍奪寶 (黎駿 飾 高貴)

今次同錢小豪、陳法蓉、張文慈、雷宇揚合演嘅 <潛龍奪寶> 雖然係99年五套電影入面最遲上畫 (但如果計開鏡時間則屬較早，所以想順序寫咗呢套先)，但正正係我最鍾意嘅一部，一嚟開心見到BENNY花心思設計新形象 (髮型/膚色/服裝) 作新開始，二嚟今次 '靚仔貴/高佬貴' 嘅角色設定比較少有地可愛討好，令人睇得舒服，從下面剪報所見BENNY自己亦非常珍惜今次能演忠角!

故事講述越南串燒三兄弟龍尊、錢小豪、BENNY (好好笑，記得 <飛虎雄心2之傲氣比天高> 入面佢又係做越南難民嗎?) 離開難民營後得老闆張午郎收留，喺佢開嘅潛水工程公司度打工。

幾條麻甩佬嘻嘻哈哈又HEA一日，睇吓BENNY幾緊張佢個歌星形象，返到公司第一時間就影佢塞住個HEADPHONE聽歌。

打完牙骹焚完機嘅黎生再大派福利：洗白白唱歌仔，當正自己開紅館演唱會咁款噃!

放工成班再落酒吧HAPPY HOUR，招積黎生即場表演拿手絕技：彈火柴賭啤酒。

一輪輕鬆搞笑之後開始入戲肉，BENNY收到風有人會由水路走私外匯，成千萬美金咁和味梗係要約埋錢諗計佈局撈返一筆啦。

兩個靜靜雞潛落公海，幾吓散手就撬走批錢返嚟，睇BENNY伸晒脷咁以為得米啦，點知打開一睇得嗰一百蚊美金，白做二人組即時頹爆。

兩個懵盛盛唔識貨，走去賤賣比收買佬程守一，都唔知原來盒嘢並唔係裝咩外匯現金，而係以雷為首嘅國際犯罪集團用嚟干擾導彈系統嘅高科技儀器...... (認住呢款夏威夷裇，之後幾篇再同大家逐件數逐件捉)

程急急轉手以為賺大錢，點知就係無咗嗰張一百蚊美金鎖匙搞到開唔到，程為求甩身於是呃佢地去機場分錢，實質交人比組織，BENNY呢個HEADPHONE男就咁樣做咗替死鬼......

BENNY被帶到去公海後即比雷五花大綁兼大肆盤問，但擺明咩都問唔到，結果錢同張只能眼白白睇住BENNY活生生被五馬分屍...... (不過我覺得最慘唔係要死，而係辛辛苦苦GEL好嘅頭就咁比無情嘅海水浸到無晒哈哈)


以下係收集返嚟嘅文字剪報 (灑吓鹽花賣吓肉，即刻多幾多報道哈哈)，希望大家會知道多啲BENNY今次嘅拍攝趣事同花絮啦：


- - - - - - - - - - - - - - - - - - - -
棄歌從影要一鳴驚人　黎駿赤裸上陣博出位
(星島日報 | A30 | 1999-05-31)

歌手黎駿棄歌從影，昨日為電影《潛龍奪寶》拍場出浴戲。他說：「我去到現場，才知有這場戲，由於劇情需要，我與經理人商量過之後，覺得無問題便決定去馬。」

黎駿演出這個鏡頭，導演共拍了三個版本，分別是背部全裸、半裸與穿上泳褲，至於最終會用那個鏡頭，則要其經理人與導演看了毛片後才決定。

獨怕臀部線條欠佳

為了忠於藝術及演員道德，亦希望自己可以出人頭地，他不介意背部全裸上陣，只擔心自己的臀部不夠靚，效果不好。拍這場戲時，有沒有做足防走光的安全措施? 他說：「導演話我已經大個仔，唔駛怕醜，所以我沒有在重要部位黐上膠紙，因為獻出了我的第一次，我要求清場拍攝，不許女性在場，免得尷尬。」

《潛》片會有場潛水戲，多個演員也要下水。黎駿說：「有相士叫我不要游水，否則會行衰運，但我仍愛水上活動。」


- - - - - - - - - - - - - - - - - - - -
黎駿清場演全裸戲　顧及形象拍三版本
(香港商報 | C07 | 1999-05-31)

黎駿昨日為《潛龍奪寶》一片，拍了一場有三個版本的沖涼戲，原本導演要求他全裸演出，但他怕會影響形象，妨礙即將在新加坡出唱片的計劃。

在經過商量後，他決定拍三個版本，分別是背部全裸，半遮半掩及穿上內褲，到最後影片上映時，才決定用哪一個版本。

黎駿表示，過往拍MTV他也曾試過穿內褲，但全裸還是首次，因此他要求導演清場，特別是不准女性工作人員在場，免得尷尬。

在片中，黎駿飾演一個忠的角色，但最後也是死得很慘，他笑言自己拍戲以來曾死過多次，但今次能夠改邪歸正做好人，總算死得值得。

而稍後他會為這部戲學滑水，原來黎駿一直都學滑水，但有相士曾忠告他不要常游水，因為游水會令他的運氣走失，雖然他自覺運氣真的不好，但卻未想過因此而放棄游水。


- - - - - - - - - - - - - - - - - - - -
黎駿全裸演新戲
(明報 | C03 | 1999-05-31)

黎駿在片中要犧牲色相，拍場背部全裸出浴戲，昨日他就是拍這場戲，足足拍了一小時。黎駿笑謂：「好彩不是浸浴缸，要不然，浸上一小時，皮都皺。」

由於當時是清場拍攝，沒有女人在場，所以他沒有在重要部位上黐上膠紙防走光。他也信得過導演，不會將他的走光照外泄，乃因導演知他稍後會在新加坡出唱片，怕這個背部全裸鏡頭，對他的形象有損，所以多拍兩個不用露臀的版本，上畫時才決定用那個版本。


- - - - - - - - - - - - - - - - - - - -
黎駿游水減運氣?
(文匯報 | 1999-05-31)

黎駿為了拍電影《潛龍奪寶》不惜犧牲色相，昨日他穿泳褲拍一場淋浴戲，一拍就一小時，他笑言好彩不是浸浴，不然皮都皺，這場戲共拍了三個版本，其中一個背部全裸，拍時他要求清場，始終這是他第一次在人前全裸。

他自言不介意全裸，最緊要拍出來有美感，昨日來到拍戲現場才知要全裸，因為他要在新加坡出唱片，為免影響形象，拍多兩個穿泳褲的版本，等經理人看過後與導演決定用哪個版本，他表示不擔心影響形象，最怕拍出來沒美感，對自己的臀部他不大有信心。

戲中他也要潛水，這些自會有人教，他自言不怕水，可是相士叫他最好不要游水，下水運氣會被扯掉，他亦覺得游完水運氣不大好。


- - - - - - - - - - - - - - - - - - - -
錢小豪逃出虎鯊口 黎駿露臀三個版本
(新報 | C05 | 1999-05-31)

黎駿在《潛龍奪寶》中有一場沖涼戲，只見他身穿一條泳褲露兩點十分性感，他坦言為迎合不同市場需要，單是這場戲已拍了三個版本。

著泳褲只是其中一個版本，另外兩個版本較 '激'，一個背部全裸，另一個則是露出大半個臀部，由於他都是去到拍攝現場才知要拍這場戲，之前已趕不及操弗，幸好身形尚算見得人!


- - - - - - - - - - - - - - - - - - - -
錢小豪潛水遇虎頭鯊
(大公報 | D08 | 1999-05-31)

錢小豪與黎駿等人昨日開工拍攝《潛龍奪寶》，前者已有兩年潛水經驗，故黎駿需得向他好好請教。

黎駿是潛水的新丁，他昨日拍攝一場沐浴戲，但到了現場才知背面要裸露上鏡。他說：「我立即致電經理人徵詢意見，因稍後我有唱片於新加坡推出，怕會影響形象。不過我覺得問題不大而導演亦明白事理，提出拍攝三個版本方案，最後會採用那一個，則留待經理人看過才決定。」而他自己覺得該片角色很好，又不用再做奸角，故更希望做得更好。

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1999] 生人勿近之問米 (黎駿 飾 博)

99年可以話係BENNY嘅一個新起點，一年間密密接咗五部電影，有意轉型拍戲搵出路，而第一套出街嘅就係同朱茵、尹天照、錢嘉樂、羅蘭合演嘅 <生人勿近之問米>。

故事講述心理系大學生朱茵每個禮拜都會做義工探龍婆羅蘭，呢日臨走時撞正已經上過嚟幾次求問米被拒嘅黑幫大佬況天佑同手下BENNY，睇佢地兩個神神秘秘又一身煞氣咁，究竟咩事猛到連羅都唔敢接佢地生意嚟做呢......

原來兩年前尹被仇家追殺，連累老婆張文慈同個仔喺間屋度比人鎖住道閘監生燒死，尹一直耿耿於懷，只求羅帶張上嚟收自己屍使良心好過。

另一邊箱BENNY刮到當日要害尹嘅冼灝英，點知冼不但矢口否認燒人全家，兇兇吓仲反而令佢記返起出事嗰晚BENNY都在場......

含住一大口怨氣嘅張睇中命格特陰嘅朱，趁自己死忌上佢身返舊居搵老公索命，好彩錢及時趕到查明真相，果然BENNY先係罪魁禍首，殺人放火插贓嫁禍都只為掩飾同張嘅一段姦情...... (黎生辛苦了，睇到啲燒衣已經焗到個頭塌晒燻到塊面又濕埋，有一下直頭爭啲辣落塊面度佢下意識避開)

慘被 'o趙完殺' 嘅張怨氣衝天發狂怒吼誓要佢地統統陪葬，第一個當然要搵BENNY填命啦，先拖佢入電錶房再一嘢嘭門夾爆佢個頭。

跟手再借埋BENNY呢隻甩頭鬼嘅半死屍身繼續困獸鬥狂劈剩低嘅朱、尹同錢，好在羅一早留定口陽氣還陽救朱，喺最後關頭一掌收咗張先至無事。

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1999] 百老薈 (演出 黎駿)

做得藝人又點可以未試過幫港台拍劇呢? 99年頭BENNY就有份參與港台為 '國際長者年' 特別製作嘅節目 <百老薈>，同司馬華龍、康華、林雅詩合演單元劇 <無事亡>。

故事講述司馬爺爺因終日無所事事而開始鑽牛角尖，自覺喺家人心目中嘅地位越嚟越低，生無可戀之下多次自尋短見，今次更決心到屋村走廊上吊，點知又唔夠高掛條繩上去，於是撳門鐘想問人借返張櫈嚟使，一身爛牛仔衫褲、玩緊電結他自HIGH中嘅BENNY應聲開門 (真係拍個劇都要保住音樂形象哈哈)，叫佢去後樓梯搵吓上次同樣有人攞嚟吊頸嘅棄櫈，仲生命大使上身話吊頸死相核突制唔過，司馬爺爺思前想後終於再次打消輕生念頭。

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1998] 偏偏愛上你 (黎駿 飾 林淮川)

先祝BENNY 9月3日生日快樂! 出完 <駿新人> 之後由於市道轉差加上身處細公司，BENNY 98年進入沉寂期，到11月先蒲頭見人，並以長髮 (又留返長) + 漁夫帽 + 迷彩系潮TEE嘅板仔形象派上新歌 有了你，以下剪報所見今次邀得李珊珊拍攝電視MV (公司對佢算唔錯，拍親MV都派港姐/華姐做女主角)，不過最後落碟嘅又唔係呢個 '一人前' 獨唱版而係合唱版，仲要再分兩個版本與唔同女星對唱 (詳情留意日後篇章)。

雖然出碟計劃受阻，但咁啱當時公司主攻原聲大碟，所以BENNY都努力配合，一年內參與三張電視劇OST嘅錄音工作，包括 <美味天王>、<難兄難弟之神探李奇> 同埋今次介紹嘅 <偏偏愛上你> (而 有了你 就係今次 <偏偏愛上你> 嘅宣傳歌曲)。

原來BENNY呢段時間除咗錄音仲北上做男一，接拍呢套內地青春電視劇 <偏偏愛上你>，劇中BENNY飾演一名高富帥男神，結識同樣熱愛歌舞嘅內地舞蹈員董曉燕，經過一輪波折終事業愛情兩得意，兩個仲合演音樂劇圓夢，雖然網上暫時未有資源 (睇住上面兩張劇照先啦)，但下面呢篇雜誌專訪有BENNY分享拍攝趣事比大家止住渴先：

黎駿　機會主義者

自從「駿新人」之後，黎駿好像消聲匿跡了好一陣子，但事實上，他在那段時間，並沒有一刻停止過工作，多月來他也在北京忙於拍攝歌舞劇「翩翩愛上你」，而稍後更會推出此齣歌舞劇的原聲大碟，並同時在香港及國內發行。


香港、北京兩邊走

「上次喺香港出完碟之後，就上咗北京拍劇，之後陸陸續續都有香港、北京兩邊走，因為香港有啲騷要做，加上又要經常返去補戲，所以嗰段時間我都好忙，只不過冇乜人知。」


充滿時代感

「劇裡面有好多歌舞嘅場面，而大部份歌曲都係羅堅寫，由於呢齣劇係中、港合作，加上又係全實景拍攝，所以開拍之前中、港兩邊都開咗好多次會，而為咗配合呢齣年青時裝歌舞劇，我自己都帶咗好多衫上去，幾乎出動晒私伙嘢，但係冇所謂啦! 希望出嚟嘅效果時代感啲。」


最大得益

「其實拍呢齣歌舞劇可以話係大膽嘗試，因為成日都要跳舞! 好似民族舞、爵士舞、的嗒舞咁，自己開頭都係完全唔識，只係以前拍MTV嘅時候練過吓，而家都好，因為我拍呢齣劇完全唔係為錢，而我又可以學識國語同埋跳舞。」


國內首張原聲大碟

「『翩翩愛上你』將於11月在北京電視台首播! 而往後更會在不同省份播影，與此同時，香港及北京更會推出原聲大碟配合宣傳，據知在國內未曾推出過有關的原聲大碟，此齣十八集的歌舞劇原聲大碟，將是國內的首張，可說是一個幾新嘅嘗試。」


從國內到香港

香港市場一向競爭激烈，新人如要殺出一條血路殊不簡單，自上次推出唱片後，黎駿便將時間放到大陸市場上，是否希望在國內奠好根基才重歸香港呢?

「基本上都係想咁嘅，香港做新人始終競爭大，如果可以打開大陸市場再返香港市場都好，我經理人簽我嘅時候都係想計劃我返大陸拍劇，不過坦白說，邊度有機會我就去邊度。」

知大家唔夠喉架啦，下面再搵BENNY 98年另一首新歌 愛情不是遊戲 (師兄羅嘉良 <天地豪情> 主題曲 仍然在痛 國語版) 嘅KTV片段比大家，睇啲場景應該係 <偏偏愛上你> 度剪出嚟架! 

BENNY果然無講大話，為咗套劇真係咩衫都攞晒上去，連 愛一生都不夠 件紫藍色西裝打歌服都要著埋哈哈。

由空少到拍旅遊特輯，而家仲撈埋澳門旅遊大使，有啲嘢真係整定

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－