[1999] 生人勿近之問米 (黎駿 飾 博)

99年可以話係BENNY嘅一個新起點，一年間密密接咗五部電影，有意轉型拍戲搵出路，而第一套出街嘅就係同朱茵、尹天照、錢嘉樂、羅蘭合演嘅 <生人勿近之問米>。

故事講述心理系大學生朱茵每個禮拜都會做義工探龍婆羅蘭，呢日臨走時撞正已經上過嚟幾次求問米被拒嘅黑幫大佬況天佑同手下BENNY，睇佢地兩個神神秘秘又一身煞氣咁，究竟咩事猛到連羅都唔敢接佢地生意嚟做呢......

原來兩年前尹被仇家追殺，連累老婆張文慈同個仔喺間屋度比人鎖住道閘監生燒死，尹一直耿耿於懷，只求羅帶張上嚟收自己屍使良心好過。

另一邊箱BENNY刮到當日要害尹嘅冼灝英，點知冼不但矢口否認燒人全家，兇兇吓仲反而令佢記返起出事嗰晚BENNY都在場......

含住一大口怨氣嘅張睇中命格特陰嘅朱，趁自己死忌上佢身返舊居搵老公索命，好彩錢及時趕到查明真相，果然BENNY先係罪魁禍首，殺人放火插贓嫁禍都只為掩飾同張嘅一段姦情...... (黎生辛苦了，睇到啲燒衣已經焗到個頭塌晒燻到塊面又濕埋，有一下直頭爭啲辣落塊面度佢下意識避開)

慘被 'o趙完殺' 嘅張怨氣衝天發狂怒吼誓要佢地統統陪葬，第一個當然要搵BENNY填命啦，先拖佢入電錶房再一嘢嘭門夾爆佢個頭。

跟手再借埋BENNY呢隻甩頭鬼嘅半死屍身繼續困獸鬥狂劈剩低嘅朱、尹同錢，好在羅一早留定口陽氣還陽救朱，喺最後關頭一掌收咗張先至無事。

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1999] 百老薈 (演出 黎駿)

做得藝人又點可以未試過幫港台拍劇呢? 99年頭BENNY就有份參與港台為 '國際長者年' 特別製作嘅節目 <百老薈>，同司馬華龍、康華、林雅詩合演單元劇 <無事亡>。

故事講述司馬爺爺因終日無所事事而開始鑽牛角尖，自覺喺家人心目中嘅地位越嚟越低，生無可戀之下多次自尋短見，今次更決心到屋村走廊上吊，點知又唔夠高掛條繩上去，於是撳門鐘想問人借返張櫈嚟使，一身爛牛仔衫褲、玩緊電結他自HIGH中嘅BENNY應聲開門 (真係拍個劇都要保住音樂形象哈哈)，叫佢去後樓梯搵吓上次同樣有人攞嚟吊頸嘅棄櫈，仲生命大使上身話吊頸死相核突制唔過，司馬爺爺思前想後終於再次打消輕生念頭。

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1998] 偏偏愛上你 (黎駿 飾 林淮川)

先祝BENNY 9月3日生日快樂! 出完 <駿新人> 之後由於市道轉差加上身處細公司，BENNY 98年進入沉寂期，到11月先蒲頭見人，並以長髮 (又留返長) + 漁夫帽 + 迷彩系潮TEE嘅板仔形象派上新歌 有了你，以下剪報所見今次邀得李珊珊拍攝電視MV (公司對佢算唔錯，拍親MV都派港姐/華姐做女主角)，不過最後落碟嘅又唔係呢個 '一人前' 獨唱版而係合唱版，仲要再分兩個版本與唔同女星對唱 (詳情留意日後篇章)。

雖然出碟計劃受阻，但咁啱當時公司主攻原聲大碟，所以BENNY都努力配合，一年內參與三張電視劇OST嘅錄音工作，包括 <美味天王>、<難兄難弟之神探李奇> 同埋今次介紹嘅 <偏偏愛上你> (而 有了你 就係今次 <偏偏愛上你> 嘅宣傳歌曲)。

原來BENNY呢段時間除咗錄音仲北上做男一，接拍呢套內地青春電視劇 <偏偏愛上你>，劇中BENNY飾演一名高富帥男神，結識同樣熱愛歌舞嘅內地舞蹈員董曉燕，經過一輪波折終事業愛情兩得意，兩個仲合演音樂劇圓夢，雖然網上暫時未有資源 (睇住上面兩張劇照先啦)，但下面呢篇雜誌專訪有BENNY分享拍攝趣事比大家止住渴先：

黎駿　機會主義者

自從「駿新人」之後，黎駿好像消聲匿跡了好一陣子，但事實上，他在那段時間，並沒有一刻停止過工作，多月來他也在北京忙於拍攝歌舞劇「翩翩愛上你」，而稍後更會推出此齣歌舞劇的原聲大碟，並同時在香港及國內發行。


香港、北京兩邊走

「上次喺香港出完碟之後，就上咗北京拍劇，之後陸陸續續都有香港、北京兩邊走，因為香港有啲騷要做，加上又要經常返去補戲，所以嗰段時間我都好忙，只不過冇乜人知。」


充滿時代感

「劇裡面有好多歌舞嘅場面，而大部份歌曲都係羅堅寫，由於呢齣劇係中、港合作，加上又係全實景拍攝，所以開拍之前中、港兩邊都開咗好多次會，而為咗配合呢齣年青時裝歌舞劇，我自己都帶咗好多衫上去，幾乎出動晒私伙嘢，但係冇所謂啦! 希望出嚟嘅效果時代感啲。」


最大得益

「其實拍呢齣歌舞劇可以話係大膽嘗試，因為成日都要跳舞! 好似民族舞、爵士舞、的嗒舞咁，自己開頭都係完全唔識，只係以前拍MTV嘅時候練過吓，而家都好，因為我拍呢齣劇完全唔係為錢，而我又可以學識國語同埋跳舞。」


國內首張原聲大碟

「『翩翩愛上你』將於11月在北京電視台首播! 而往後更會在不同省份播影，與此同時，香港及北京更會推出原聲大碟配合宣傳，據知在國內未曾推出過有關的原聲大碟，此齣十八集的歌舞劇原聲大碟，將是國內的首張，可說是一個幾新嘅嘗試。」


從國內到香港

香港市場一向競爭激烈，新人如要殺出一條血路殊不簡單，自上次推出唱片後，黎駿便將時間放到大陸市場上，是否希望在國內奠好根基才重歸香港呢?

「基本上都係想咁嘅，香港做新人始終競爭大，如果可以打開大陸市場再返香港市場都好，我經理人簽我嘅時候都係想計劃我返大陸拍劇，不過坦白說，邊度有機會我就去邊度。」

知大家唔夠喉架啦，下面再搵BENNY 98年另一首新歌 愛情不是遊戲 (師兄羅嘉良 <天地豪情> 主題曲 仍然在痛 國語版) 嘅KTV片段比大家，睇啲場景應該係 <偏偏愛上你> 度剪出嚟架! 

BENNY果然無講大話，為咗套劇真係咩衫都攞晒上去，連 愛一生都不夠 件紫藍色西裝打歌服都要著埋哈哈。

由空少到拍旅遊特輯，而家仲撈埋澳門旅遊大使，有啲嘢真係整定

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1997] 黎駿．九七．下 (首張個人唱片 - 駿新人)

咦咦，呢位成個太陽眼鏡廣告MODEL咁款嘅靚仔係邊位? 之唔係 '駿新人' BENNY囉! 由96年中開始計劃嘅迷你EP專輯，到97年頭拍攝封面內頁 (認得呢幾件 十萬八千種鮮花 時期嘅打歌服嗎?)，等到頸都長埋，BENNY嘅處男大碟 <駿新人> 終於喺暑假期間正式面世!

NTR-CD-012 (CD)

駿新人

01. 愛一生都不夠

02. 不認．不認 (第二代)

03. 十萬八千種鮮花

04. 害怕．逃避．以後

05. 浪子心情

06. 心痛

07. 逃

08. 一廂情濃

09. 情不自禁

10. 十萬八千種鮮花 (Slowly Version)

11. 不認不認還須認

12. 愛一生都不夠 (情陷篇)

唱片封套設計以藍綠CYBER色調為主，再加插大量細胞/分子/元素/亂碼/程式嘅視覺效果，全面配合 '新一代/新人類' 主題，歌曲排位亦略有用心，間隔分明有致，先以三首主打打頭陣，下接三首成熟深情歌緩衝回氣，再落三首主打嘅姊妹作留住聽眾，最後放三首主打嘅REMIX版本作首尾呼應，既然有晒層次，我就先順序講吓主打三寶，除咗先前介紹過嘅 十萬八千種鮮花 同 不認．不認 (第二代) (下稱 不認不認)，當然唔少得擺喺FIRST CUT嘅重點主打 愛一生都不夠。

愛一生都不夠 由監製郭熾賢悉心打造，作為大路K歌主打可謂非常稱職穩陣，難得手執好歌，BENNY都擺多咗心機落去唱 (聽得出係全碟入面感情投放最多，用聲最自然嘅一首)，副歌部分仲同 不認不認 一樣嘗試用佢偶像嘅學友腔去演繹，尤其係 '求～永～久～　愛一生都不夠　愛千生都彷如未～夠～' 呢句，另外不得不提嘅就係由中段MUSIC BRIDGE開始加入蘇德華老師嘅神級電結他JAM，好能夠帶動到個情緒，令首歌由100分直上去200分!

公司都好重視 愛一生都不夠，除咗印製白版宣傳碟 (嘩封底真係不得了!)，仲揼重本大買夜間廣告時段吸引樂迷試聽 (記得同期洗腦式狂播嘅 狡辯 同 明知故犯 嗎?)，既然有意攻陷K場，最重要梗係借返間大屋別墅拍返個靚靚KTV啦，圖中所見BENNY先著上今次嘅打歌服 (紫藍色西裝) 拍幾個憂鬱SHOT。

睇嚟成個團隊真係好鍾意綠色，唔單止唱片封套同白版碟封套就連KTV畫面都刻意校到綠一綠 (好正，右下圖BENNY早人廿年擺咗個EMOJI公仔樣出嚟哈哈)。

'97鮮肉LOOK登場哈哈，仲要好犯規咁比人綁身綁勢，乜玩到咁大呀黎生。

點少得同女主角纏綿激情嘅戲份呢，臨尾二人更大玩濕身 (但係入面著晒婚紗禮服) 搞泳池婚禮一邊游水一邊曬戒指 (有婚紗同鑽飾贊助嘛)。

聽完主打，下一轉呢三首歌就走成熟風 (編曲較簡單直接，唱法亦刻意用沙聲/爛聲營造滄桑/浪子感) 間一間場，上次介紹咗 浪子心情，今次呢首 害怕．逃避．以後 就偏向佢師兄羅嘉良嘅劇集主題曲風格，畫面/場景感較重，而BENNY嘅唱功實力亦有驚喜，其中副歌嘅 '沒法去放棄卻一早得知妳曾像犧牲品一般輕倚我肩　直到我發覺強裝的依戀再沒有意義' 成句尤如過山車般又長又高又低好蝦人唱，但BENNY啲高音上得到位亦夠氣，令人聽得舒服。

點解個個都有枝咪揸吓係得呀黎生你無嘅...

講到碟內最詭異嘅歌莫過於潘美辰作曲嘅 心痛，首歌早喺三年前已經以 舊夢 為名出過版，收錄喺甘子暉嘅處男大碟 <換季情人> 入面作為一首原創主打，今次 心痛 居然就咁沿用返當年嘅歌詞同編曲純粹重唱一次，我唔清楚箇中因由，只知甘當時嘅老闆應該都同BENNY一樣係趙潤勤，可能公司唔想埋沒咗首好歌所以要BENNY呢個師弟唱多一次。

隻碟咁就聽咗一半啦! 跟住再落呢三首都各自同主打三寶有相同/搭配之處，有少少 'B面主打' 嘅味道，先講講監製郭熾賢嘅另一首作品 逃，呢首好明顯係 不認不認 2.0，編曲瀰漫住好重嘅末世/不安感覺，好啱我口味 (亦係碟內小弟最鍾意嘅一首)，歌詞更邀得夕爺幫手，對比 不認不認 用WYMAN，相信公司都睇到呢兩首歌嘅潛力 (最能帶出BENNY嘅現代感/型格，亦能配合公司想要嘅 '新' 感覺) 而有此安排。

至於 一廂情濃，由於呢首嘅作曲填詞人就係為 愛一生都不夠 寫詞嘅鄧偉成，所以自然同 愛一生都不夠 配成一對抒情K歌孖寶，我都幾鍾意呢首，旋律夠易記洗腦得嚟兩首歌仲要似到連中段嘅MUSIC BRIDGE都有段相似嘅電結他SOLO添。

上次略略提過雷頌德作咗呢首 情不自禁 比BENNY，似乎係佢比較早期嘅作品 (尤其聽到中後段編入嘅舊式SAXOPHONE SOLO)，不過雷氏作品一向平實順耳，一睇個歌名就知係首冧爆情歌啦，可以夾埋 十萬八千種鮮花 嚟一齊聽。

翻版發哥，點計都好聽過翻版倪生啦...

嚟到最後呢PART，製作團隊都算有心思，幫主打三寶換新衫製作REMIX版本，唔好以為就咁馬馬虎虎改少少編曲就算，BENNY都要重唱重錄過架，好似 十萬八千種鮮花 (Slowly Version) 咁，今次BENNY就唱得比原版實淨，編曲節奏則顧名思義較原版為慢，亦編得GRAND咗/夢幻咗，有啲似日劇大結局啲甜蜜婚禮進行曲咁。

成日話黎生個樣好奸，奸乜鬼，明明行緊可愛路線...

不認不認還須認 VOCAL上雖然無大嘅改動，但編曲就完全抹走晒原版前衛有型嘅感覺，改為RAW RAW地又帶點野性嘅味道，行陳曉東同期嘅 心理遊戲 / 結他 路線 (根本連唱片封面個長髮 + TRENCH COAT造型都同阿東嘅 <暖情> 封面如出一徹)。

各位施主，肯封佢做可愛教主未呢?

愛一生都不夠 (情陷篇) 以REPRISE/UNPLUGGED形式改編，BENNY亦特登降咗KEY去唱，副歌部分更加插女聲和音對唱 (有啲似 一生愛你一個)，比原版更添情濃/痴心感覺，絕對適合擺喺全碟嘅LAST CUT位置。

總括全碟選曲合適，歌曲耐聽度亦高，另外想講MASTERING做得唔錯，有幾首歌調得特別有空間感，推介大家落雨嘅時候揸/搭住車一路聽住雨聲一路煲呢隻碟，真係好FEEL到你唔信!

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

[1997] 黎駿．九七．中 (不認不認)

進入夏季呢個黃金宣傳檔期，同時亦意味住離BENNY出碟嘅日子越嚟越近啦! 公司除咗為佢再設計新形象新髮型以轉行型格路線，仲派上一首醒神快歌主打 (亦係眾多主打入面小弟最鍾意嘅一首) 不認不認 加強攻勢。

不認不認 音樂部分由ADRIAN CHAN製作ROCK底曲風，INTRO一起已經充滿CYBER/未來/電子FEEL，歌詞方面仲勁搵到WYMAN幫手 (可見公司有心打造)，中心主題可圈可點，你話係 '不認不認' 一段地下情/偷情又得，話係一首HEHE之歌又得...... 睇你想點演繹啦哈哈。

為配合強勁快歌路線，BENNY嘅唱腔亦有所調整，首先比前兩首慢歌主打減少輕聲氣聲嘅運用，尾音位更嘗試模仿佢偶像歌神學友，尤其係副歌部分嘅  '既然你要認命怎麼不夠勇氣說出實情～～'  '既然你要認命應該不怕對各界承認～～'  '既然你要認命這麼英勇索性痛快的～～招認'  呢幾句份外明顯。

至於電視MV今次就邀得袁彩雲參與拍攝，上圖所見都有配合返首歌，畫面都係灰灰藍藍嘅CYBER LOOK，再同成班女DANCERS走上天台跳舞，媒體似乎都好BUY 不認不認，除咗叱咤榜最高上到第八位，BENNY亦憑呢首歌先後入圍兩季季選嘅傑出新人獎，最終順利入選第二季季選嘅六強新人。

片段所見BENNY同胡蓓蔚、DRY、沈魚、謝霆鋒、丘采樺角逐傑出新人獎，OPENING適逢回歸一班候選新人齊齊合唱改詞版本嘅經典老曲 KOWLOON HONG KONG 同 第二春 暖吓場，值得一提嘅係BENNY繼 <共創香港好明天> 之後再一次負責唱埋和音。

今次嘅表演形式同上次 <第一季季選> 好唔同，呢晚各個新人要SOLO唱前輩金曲，而BENNY就揀咗 黑色午夜 (記得 <翡翠歌星賀台慶> 佢都係唱哥哥嘅歌嗎?)，為咗今次表演BENNY都落晒力，先換窄衫窄褲再戴頸鏈手鏈戒指扮晒ROCK咁 (順便配合返 不認不認 嘅新形象嘛)，又借埋枝MIC STAND SET晒台風咁。

除咗唱歌當然唔少得拉票環節啦，BENNY嗰日狀態好似好唔錯咁噃 (同樣比較專心同有所準備嘅有丘采樺同豹嫂)，笑容好靚 (千祈唔好以為左上圖出錯字幕呀，條BAR其實一路郁緊架哈哈)。

雖然最尾宣佈謝霆鋒贏得傑出新人獎，但BENNY個LOOK居然仲ROCK過當時嘅CHEF LEMON哈哈!

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－