經過半年嘅曝光，BENNY終於喺97年頭開始發力出歌啦! 我唔清楚BENNY派歌嘅次序，不過以我推測第一首派台歌應該係 浪子心情，睇佢上面呢個咁憂鬱嘅表情再加埋份硬TAG歌名嘅雜誌專訪就知點解啦 (不過睇返報道又好似仲有首無落到碟嘅 情陷夜眾生? 有無勁人可以解答到?)。
浪子心情 係一首偏慢熱同深情嘅作品，編曲以木結他伴奏為主，隱約營造出一種寂靜孤清嘅氣氛，配合埋BENNY略帶氣聲嘅演繹，感覺就好似佢喺寒冬下獨行瑟縮取暖咁，好有畫面。
至於歌詞內容顧名思義就係一個浪子嘅自白，以為會係嗰啲扮晒無腳雀仔不受束縛嘅PLAYBOY? 咁就錯晒啦，正如上面份剪報所講，今次係不一樣嘅浪子心情，填詞人梁芷珊有晒故仔比BENNY架，講佢逃避愛情正正係因為無法忘懷之前嗰段刻骨銘心逾越生死嘅真愛，寧願今後隻身飄泊，唔會再接受第二個嘅心意。
眨吓眼踏入初春，BENNY亦趁機大執形象換上春裝，第一眼睇到嘅係剪短咗頭髮以中長髮示人，除咗頻頻出席活動如 <飢饉三十>、<公益開心果> (好正同EASON一齊玩遊戲食PIZZA)、<博愛歡樂傳萬家> (好正同EASON一齊扮美式足球員)、<青嶼幹線創建新紀元> (好正同EASON一齊唱山歌) 等等，當然唔少得派返首花季點題主打 十萬八千種鮮花。
十萬八千種鮮花 改編自日本歌曲，旋律輕快悅耳又易上口，歌詞部分由敏大人李敏操刀，將BENNY嘅形象寫得生動立體又帶幾分傻氣戇直，而字裡行間出現嘅花名更為歌曲增添浪漫氣質，成功令BENNY由一個冷酷浪子變成一個花花暖男。
至於電視MV就仲吸睛，先出外景行一轉花墟，戴吓超SHOW吓老鼠仔再揀吓花。
返到錄影廠就着返今次件打歌服 (銀灰色TRENCH COAT)，同女主角湯盈盈扮吓純情玩吓層層疊 (唔講仲以為拍緊兒童節目哈哈)。
鏡頭一轉，BENNY換上另一件彩色直間恤衫嘅打歌服 (一個MV五套衫，好搏喎黎生!)，繼續同DAVID姐攬吓狗仔 (左下圖隔住個MON都FEEL到有人被導演要求不停CHOK樣哈哈)。
講到成個MV最大工程同最揼本嘅莫過於呢個花園佈景，上面剪報所見係唱片公司洗咗成廿萬搬晒啲花入電視城，好堅+好豪+好靚呀!
經過一輪落力宣傳，BENNY順利打入季選爭奪傑出新人獎，其餘五強單位包括：陳琪、SUSAN WONG (同於澳洲長大)、鄭中基、譚小環 (同為前空中服務員，主打歌同搵郭熾賢、梁芷珊、李敏等班底打造)、DRY (雷頌德作咗首歌比BENNY)。
BENNY首先出動空少式笑容拉個靚票，仲好認真咁度晒稿架，話 '天王有黎明，靚女有黎姿，新人有黎駿'。
拉完票，一眾候選新人要各自分組輪流表演，而BENNY同陳琪呢PAIR就揀咗 從不喜歡孤單一個 嚟合唱，一個SELL自彈自唱一個就坐定定SELL唱功，出嚟效果都唔錯，唔使比人叫 '黎主席'。
雖然最後由鄭中基贏得傑出新人獎，但我留意到當佢唱緊得獎歌曲 搬屋 嘅時候，咁多個新人入面係得BENNY一個喺後面全程口噏噏跟住唱到尾，歌痴鑑定無誤!
－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－
